RARIK rekur í dag stærsta dreifikerfi raforku á Íslandi ásamt því að reka hita- og fjarvarmaveitur á fimm stöðum á landinu. Dreifikerfið er í stöðugri endurnýjun og á næstu 6 árum verður orkumælum í dreifikerfi RARIK um allt land, bæði raforkumælum og hitaorkumælum, skipt út fyrir snjallmæla. Nýju snjallmælarnir eru með samskiptabúnaði sem skilar upplýsingum um notkun til miðlægrar safnstöðvar RARIK. Heimsóknir á vegum fyrirtækisins til að lesa á mæla viðskiptavina munu leggjast af en ætla má að álesarar RARIK hafi ekið u.þ.b. 60 – 100 þ. km á ári til þess að ná í lögbundna álestra. Snjallmælavæðingin mun því draga úr losun gróðurhúsalofttegunda sem svarar a.m.k. 8,6 tonnum af koldíoxíð á ári. Með nýju orkumælunum munu reikningar byggja á upplýsingum um raunverulega notkun hvers mánaðar í stað áætlunar og uppgjörsreiknings í kjölfar álesturs. Viðskiptavinir geta því fylgst betur með orkunotkun sinni, gripið fyrr inn í ef notkunin þykir óeðlileg og dregið þannig úr óþarfa orkunotkun.