Landmælingar Íslands í samvinnu við Veðurstofu Íslands og PGC við háskólann í Minnisota í USA hafa útbúið nýtt hæðarlíkan af Íslandi með 2x2 m upplausn, staðsetninganákvæmni upp á 3 m og hæðarnákvæmni upp á 1 m. Líkanið er opið öllum og gjaldfrjálst og má skoða á slóðinni http://atlas.lmi.is/dem. Gögnin nýtast til skipulags, rannsóknar og til nýsköpunar og eru gögnin þegar komin í notkun við mat á náttúru landsins bæði vegna ofanflóða en einnig við mat á bráðnun jökla vegna loftslagsbreytinga. Með tilkomu hæðarlíkansins gefst öllum sem vilja kostur á að nýta sameiginleg grunn gögn en fram til þessa hafa aðeins verið til 10x10 m hæðarlíkan sem hefur verið gjaldfrjálst og öllum opið. Samvinna milli stofnana á Íslandi varð að samnýtingu hugvits sem ól af sér nýja aðferðarfræði sem nýtast mun hjá PGC til að auka gæði gagna af norðurslóðum og öllum heiminum í framhaldi.