Heildarstefna Reykjanesbæjar, sem ber yfirheitið „Í krafti fjölbreytileikans“, hefur tengt 12 Heimsmarkmið við stefnuáherslur sínar. Ásamt stefnunni er Heimsmarkmiðunum ætlað að varða leiðina í átta að framtíðarsýninni og hafa áhrif á starfsáætlanir og verkefnaval starfsmanna til ársins 2030. Stefnan hefur fengið yfirheitið „Í krafti fjölbreytileikans“ sem er vísun í mikilvægi þess að virkja þann fjölbreytta mannauð sem myndar ört stækkandi samfélag. Stefnan samanstendur af framtíðarsýn, sex stefnuáherslum og þremur gildum. Heimsmarkmiðin eru síðan tengd hverri stefnuáherslu en þær eru; börnin mikilvægust, vellíðan íbúa, vistvænt samfélag, fjölbreytt störf, kraftur fjölbreytileikans og skilvirk þjónusta. Frá samþykkt bæjarstjórnar hefur verið unnið að kynningu á nýju stefnunni og Heimsmarkmiðunum fyrir starfsmönnum Reykjanesbæjar. Formleg innleiðing á stefnunni hófst síðan í ársbyrjun 2020. Miðað var við að starfsáætlanir ársins 2020 tækju mið af nýrri stefnu og Heimsmarkmiðunum.