Stefna RARIK er að vera traust og samfélagslega ábyrgt fyrirtæki sem er til fyrirmyndar í umhverfismálum. Gerð hefur verið aðgerðaráætlun í loftslagsmálum til að minnka markvisst losun gróðurhúsalofttegunda (GHL) frá starfseminni og draga úr þeim áhrifum sem losunin hefur í för með sér. Með því leggur fyrirtækið sitt af mörkum til að ná sameiginlegum markmiðum Parísarsamkomulagsins. Við skilgreiningu á kolefnisspori RARIK er notast við Greenhouse Gas Protocol staðalinn (GGP) og áhersla lögð á að draga úr beinni losun GHL í áföngum með uppbyggingu innviða og orkuskiptum. Það sem út af stendur er kolefnisjafnað með kaupum á kolefniseiningum þannig að fyrirtækið teljist kolefnishlutlaust. Upplýsingar um árangur aðgerða eru reglulega kynntar stjórn og framkvæmdaráði, sem jafnframt samþykkja breytingar sem þarf til að áætlaður árangur náist. Aðgerðaáætlun RARIK í loftlagsmálum er endurskoðuð og endurútgefin árlega og má nálgast á vefsíðu RARIK.