Skólar á grænni grein eru eitt helsta innleiðingartæki menntunar til sjálfbærni í heiminum í dag. Verkefnið má finna í 67 löndum víðsvegar um heim og taka um 200 íslenskir skólar á öllum skólastigum þátt. Í skólunum er unnið að fjölbreyttum verkefnum og er sjálfbærni, lýðræðismenntun og geta til aðgerða höfð að leiðarljósi. Sérfræðingar hjá Landvernd veita skólum leiðsögn, fræðslu og stuðning. Verkefnið byggir á sjö skrefum sem skólinn tekur á tveggja ára tímabili. 1. Umhverfisnefnd: Í nefndinni sitja nemendur og starfsfólk skóla. 2. Mat á stöðu umhverfismála: Nefndin metur stöðuna með gátlistum. 3. Markmiðasetning: Nefndin velur þema og 4-6 markmið til að vinna að. 4. Eftirlit og endurmat. 5. Námsefnisgerð og tenging við aðalnámskrá. 6. Að upplýsa og fá aðra með. 7. Umhverfissáttmáli. Ef skólinn nær settum markmiðum fær hann að flagga grænfánanum til tveggja ára. Verkefnið hefur víðtæk áhrif og taka skólar ábyrga afstöðu í málum sem snerta umhverfið.